Policia Kombëtare spanjolle, autoritetet nga Gjermania dhe Shqipëria, me mbështetjen e EUROPOL, kanë kryer një mega-operacion kundër krimit të organizuar me origjinë shqiptare. Në kuadër të këtij operacioni, u bë e mundur arrestimi i 107 personave, që dyshohet se janë pjesë e kësaj bande kriminale të trafikut dhe kultivimit të lëndëve narkotike, si dhe sekuestrimi i një sasie droge.
Në kuadër të mega-operacionit të koduar `DOBRA`, u kryen kontrolle në 51 ambiente në Spanjë, nga të cilat u zbuluan 23 plantacione/shtëpi bari. Po ashtu mësohet se u asgjësuan rreth 25.000 bimë narkotike kanabis, u sekuestruan 938 kg boçe kanabisi, një detonator, dy armë zjarri, tri mjete luksoze, një bllokues valësh, 68.760 euro etj.
Dyshohet se grupi kriminal menaxhonte plantacionet e kanabisit në Spanjë ku ata kultivonin dhe përpunonin marijuanën, para se të transferohej në vendet e tjera evropiane për shpërndarje.
Ky grup kriminal i organizuar me bazë klani, ishte i strukturuar në mënyrë hierarkike, me degë që vepronin ndërkombëtarisht. Disa nga anëtarët e saj të arrestuar kanë një histori të trafikut të drogës në vende të ndryshme.
Kriminelët po devijonin furnizimin me energji elektrike për të kultivuar ilegalisht bimët në ambiente të mbyllura. Ishte vlerësuar se energjia elektrike e vjedhur arrin në mbi 1.6 milion € në të ardhura të humbura të shërbimeve.
Europol e mbështeti këtë hetim duke siguruar ekspertizë të përshtatur dhe mbështetje të gjerë analize dhe duke lehtësuar shkëmbimin e informacionit përmes kanaleve të tij të sigurta. Në ditën e aksionit, një post komandues virtual u krijua nga Europol për të siguruar koordinim të përsosur midis të gjitha autoriteteve të përfshira. Një nga ekspertët e saj u vendos në vend në Spanjë për të lejuar kontrolle të të dhënave kundër bazave të të dhënave të Europolit të mbledhura gjatë aksionit.
Reagimet
Në konferencën për shtyp në Madrid të megaoperacionit të përbashkët të koduar `DOBRA` kanë dhënë detaje Drejtori i Përgjithshëm i Policisë së Shtetit, Ardi Veliu si dhe shefi i Divizionit të Hetimeve Kriminale të Skuadrës së Lëvizshme të Policisë Spanjolle, Ramón Chacón.
“Pas një viti hetime më në fund kemi rezultate. Edhe Policia shqiptare që merr pjesë në operacion ka dhënë informacion për të gjithë shtetasit shqiptarë për të përfshirët në aksion. Ne nuk do të mjaftohemi vetëm me përfundimin e operacionit në këtë stad. Do të vazhdojmë hetimet për provat që janë siguruar deri më tani. Duke e goditur edhe në pjesën ekonomike japim goditje të fortë ndaj grupit kriminale,” tha Ardi Veliu.
Ndërkaq, Ramón Chacón u shpreh se shqiptarët janë sekserët e kanabisit në Europë.
“Operacioni zgjati 1 vit dhe është operacioni më i madh kundër mafies shqiptare. Është e rëndësishme sepse, normalisht kemi shumë plantacione kanabisi. Ne jemi eksportues në Europë, kërkesa nga Gjermania është në rritje. Shqiptarët që vijnë këtu janë sekserët e marijuanës, sepse kontaktojnë mafien spanjolle që merret me ngritjen e shtëpive të barit dhe më pas gjejnë blerësit. Prandaj është e rëndësishme që të bashkëpunojmë me policinë shqiptare”, u shpreh ai.
“Kjo drogë që prodhohet këtu, shkon në Gjermani dhe prej andej në vende të tjera të Europës. Ne jemi eksportuesit numër 1 të marijuanës, nuk është krenari. Por problemi është se importojmë krim të organizuar dhe eksportojmë marijuanë. Vijnë te ne anëtarë të krimit të organizuar nga Shqipëria, Suedia, Gjermania, Belgjika, Britania. Të gjithë këta janë shumë të dhunshëm dhe konfliktohen me njëri-tjetrin për marijuanën. Kjo ka bërë që të rritet edhe kërkesa për armë, çka ka sjellë një rënie të çmimit të tyre në tregun e zi. Kjo rrit edhe vrasjet”.
“Kemi të paktën 3 vrasje në vit që lidhen me trafikun e marijuanës. Në këtë rast që kemi zbuluar ka pasur 2 raste të tentativës së vrasjes, për shkak se këta njerëz kishin elektrifikuar portën kryesore, kusho që e prekte atë, mund të vdiste. Janë të fiksuar me sigurinë e plantacioneve të drogës. Kanë vjedhur energji që shkon në shifra që do furnizonte për një vit 2 mijë familje spanjolle”, tha Chacón.
/Priza.al/
