As buka nuk është më një produkt i sigurt dhe lehtësisht i sigurueshëm për shqiptarët tashmë.
Ditët e fundit çmimi i bukës dhe i miellit është rritur sërish në treg, duke bërë që Shqipëria të renditet si vendi i parë në Europë me çmimin më të lartë të tij në raport me të ardhurat për frymë.
Por si të mos mjaftonte kjo, tregu në vend është dominuar prej kohë prej karteleve që vendosin dhe monopolizojnë çdo treg dhe produkt, duke përfituar edhe nga mungesa e reagimit të institucioneve siç është dhe Autoriteti i Konkurrencës.
Por ky i fundit është shfaqur këto ditë dhe është “zgjuar nga gjumi” duke paralajmëruar tregtarët e miellit, që të mos përcaktojnë çmime të blerjes apo shitjes së miellit në treg.
Reagimi zyrtar erdhi pasi nga një hetim i thelluar bërë në tregun e importit, prodhimit dhe tregtimit të miellit ka konstatuar çmime të paracaktuara.
Bëhet fjalë konkretisht për kompanitë, të cilave Autoriteti i Konkurrencës i detyroi që mos të përcaktonin çmimet.
Ky paralajmërim erdhi në një kohë që disa furra kanë rritur çmimin e bukës me 100 Lekë të vjetra.
Autoriteti i Konkurrencës bën me dije se:
- Komisioni i Konkurrencës, me anë të vendimit nr. 700, datë 24.07.2020 ‘Për mbylljen e hetimit të thelluar në tregun e importit të grurit, importit, prodhimit dhe tregtimit të miellit ndaj ndërmarrjeve Agro Blend SHPK, Miell Tirana SHA, Bloja SHA, Atlas SHA dhe Atlas Mills SHPK, me kushte dhe detyrime dhe dhënien e disa rekomandimeve për MFE, MBZHR dhe AKU’ ka vendosur:
- Konstatimin e sjelljes së bashkërenduar midis ndërmarrjeve Agro Blend SHPK, Miell Tirana SHA, Bloja SHA, Atlas SHA dhe Atlas Mills SHPK, në tregun e importit të grurit, importit, prodhimit dhe tregtimit të miellit, pasi këto ndërmarrje bashkërendojnë sjelljen duke caktuar çmimet e shitjes dhe duke kontrolluar prodhimin në tregun e miellit për shkak të integrimit vertikal, sjellje e cila bie në kushtet e zbatimit të nenit 3 pika 4, dhe nenin 4 pika 1 gërma a dhe b të ligjit 9121/2003 ‘Për mbrojtjen e konkurrencës’.
- Detyrimin e ndërmarrjeve Agro Blend SHPK, Miell Tirana SHA, Bloja SHA, Atlas SHA dhe Atlas Mills SHPK si vijon:
- Të mos caktojnë, në mënyrë të drejtpërdrejtë ose të tërthortë, çmimet e blerjes ose të shitjes, apo çdo kusht tjetër tregtimi;
- Të mos kufizojnë ose kontrollojnë prodhimin, tregjet, zhvillimin teknik ose investimet;
- Të mos ndajnë tregjet ose burimet e furnizimit;
- Gjatë periudhës së monitorimit të raportojnë çdo 3 (tre) muaj pranë AK-së të dhëna mbi blerjet dhe shitjet në përmbushje të detyrimeve të dhëna sipas kësaj pike.
III. Moszbatimi i përmbushjes së pikës III të këtij vendimi, në zbatim të nenit 73 dhe 74 të ligjit nr. 9121/2003, ndëshkohet me penalitetet përkatëse.
- Monitorimin e sjelljes së ndërmarrjeve Agro Blend SHPK, Miell Tirana SHA, Bloja SHA dhe Atlas Mills SHPK për një periudhë 1 (një) vjeçare.
- Komisioni i Konkurrencës do të shprehet me një vendim mbi zbatimin e kushteve dhe detyrimeve të dhëna me anë të vendimit nr. 700, datë 24.07.2020 të cilat shtrihen në kohë edhe pas përfundimit të periudhës 1 (një) vjeçare të monitorimit.
/Priza.al/
