Gjatë vizitës së tij në Kosovë, kryeministri Rama tha se nuk ka pasur asnjë bisedë me Presidentin e Serbisë , Aleksandër Vuçiç lidhur me tensionet në kufirin
Kryeministri Edi Rama tha nga Prishtina se nuk ka pasur asnjë bisedë me Presidentin e Serbisë, Aleksandër Vuçiç, lidhur me tensionet në kufirin Serbi-Kosovë për reciprocitetin e targës.
Me tone të ashpra, Rama tha se nuk ka asgjë për të ndërmjetësuar në këtë çështje, pasi e drejta është me Kosovën.
Ai kritikoi ashpër Serbinë për djegien e qendrave të regjistrimit në pikat kufitare, si dhe për fluturimin e helikopterëve mbi këto pika, ndërsa ngriti edhe pyetjen se “Çfarë donte ambasadori rus atje?”, duke e cilësuar këtë si një teatër të rrezikshëm.
“Nuk kam pasur një bisedë me Presidentin Vuçiç, apo siç thonë ata në rrjetet sociale “me vëllain tim Vuçiç”, sepse këtu nuk ka asgjë për të ndërmjetësuar. Jemi në kushtet ku e drejta është me Kosovën dhe kjo është shumë e qartë. Ne jemi absolutisht në krah të Kosovës, siç është i gjithë komuniteti ndërkombëtar. Leximi i çuarjes së njësive speciale si një arsye për të bërë teatër me helikopterë e aeroplanë në Serbi, është leximi më i gabuar. Parafytyroni për një moment, le ta parafytyrojë edhe vëllau im atje, sikur larg qoftë të kishte ndodhur diçka, në kushtet kur po sprovohej qëndrueshmëria e shtetit. Uroj që kjo të shërbejë për të çuar përpara dialogun. Nuk duhet ta harrojmë çfarë ndodhi me tarifën 100%. Unë e kam mbështetur si një klithmë të drejtë për të shtruar një problem të drejtë, por ajo tarifë u kthye në litar në këmbët e Kosovës, për shkak se kaloi nga një akt për të shtruar problemin, në një problem më të madh se vetë problemi.
Kjo gjë duhet shmangur dhe jam i bindur se të gjithë kolegët këtu e kanë të gjithë largpamësinë dhe pjekurinë për ta shmangur. Dua ta përsëris se djegiet e institucioneve nuk i provokojnë forcat legjitime të rendit dhe sigurisë së Kosovës, ato djegiet atje i provokojnë ato fluturimet akrobatike të avionëve e helikopterëve, dhe marrja peng e qytetarëve të Kosovës, në kushtet e një dialogu që nuk ecën si duhet. Jam i bindur që dialogu është e vetmja rrugë, por çfarë do ambasadori rus? Imagjinoni sikur ambasadori amerikan të shkonte në kufi e të shikonte çfarë bëjnë njësitë speciale. Natyrisht që ky është një teatër, por është teatër i rrezikshëm, sepse është shkrepësja që djeg institucionet”, tha Rama.
/Priza.al/
