Çuditë nuk kanë të sosur në vendin tonë, sidomos në sport ku niveli është amator dhe ekipet janë më shumë në formën e kooperativave sesa shoqërive aksionere siç duhet të jenë. Çudia e radhës vjen nga Librazhdi, ku ekipi i sportit në këtë qytet që militon në kategorinë e dytë ka dy muaj pa marrë pagat.
Lojtarët edhe pse e kanë mbyllur sezonin që në muajin prill, ende nuk kanë mbyllur llogaritë financiare me klubin. Lidhur me këtë problem një përfaqësi e lojtarëve librazhdas kanë kërkuar takim me administratorin e ekipit të “Sopotit”, Andri Çota, njëherazi nën kryetar i Bashkisë Librazhd. Në takim lojtarët kanë kërkuar pagat e prapambetura, por si përgjigje nga administratori kanë marrë justifikimin se buxheti është në limite dhe se aq para sa kanë mbetur mjaftojnë për të likujduar vetëm 5 lojtarë. Të zënë ngushtë dhe pa alternativë lojtarët kanë hedhur short letra me vrimë mes tyre për të përzgjedhur ata 5 lojtarë që do merrnin pagat.
Lojtarët, të cilët qëlluan me fat në këtë ‘garë’, ishin: Mateus Levendi, Ardian Kaloshi, Denis Mici, Antonio Ranxha dhe ndihmës trajneri Shkëlqim Hajdari. Më pas lojtarët janë takuar në një nga kafene të e qytetit me Çotën, ku kanë marrë dhe paratë. Lajmin e bën të ditur gazetari i sportit në qytetin e Librazhdit, Ledion Qoshku, i cili ka publikuar në rrjetin e tij social Facebook, një foto të bisedës që lojtarët dhe administratori kanë zhvilluar në whats up.
Gazetari ngre dyshimin lidhur me buxhetin e sportit tek “Sopoti”, se është i manipuluar, pasi sipas raporteve financiare që buxheti i bashkisë Librazhd ka dhe dega e thesarit akordon çdo muaj, janë të bollshme për të mbuluar shpenzimet e pagave të lojtarëve. Në buxhetin e bashkisë, fondi për sportin tejkalon 120 milionë lekë (të vjetra) në vit, që lëvrohen sipas raporteve në degën e thesarit 10 milionë (të vjetra) çdo muaj. Ndërkohë që edhe pse janë kaq para në dispozicion për një ekip sporti që militon në kategorinë e dytë, sërish problemet financiare janë prezente dhe lojtarët detyrohen të bëjnë zgjedhje me ‘letra me vrimë’ se kush do të marrë pagat, e kush jo.
