Ambasadori i BE-së, Luigi Soreca, ka inkurajuar komisionerët që të vazhdojnë punën. Në një komunikim për mediat nga “Shkolla e Kuqe”, nga ku dhe ka ndjekur nga afër procesin zgjedhor, ai ka kërkuar që të mos nxirren konkluzione pa përfunduar numërimi. Ambasadori Soreca tha se deri sa të numërohet vota e fundit, palët politike duhet të presin me qetësi dhe të mos dalin në konkluzione. Soreca gjithashtu theksoi se pjesëmarrja në votime ishte e lartë, ndërsa theksoi se votimi elektronik ishte një shenjë e mirë.
“Mirëdita. Sot ishte dita e dytë e vëzhgimit në këtë moment kaq të rëndësishëm për Shqipërinë. Po shkoj në disa nga Qendrat e Numërimit në Tiranë. Në disa prej tyre ekipet po bëjnë pushim, në mënyrë që të rifillojnë punën.
Më lejoni të them që procesi duhet të vijojë pa problem dhe vonesa, sepse kemi shumë gjëra për të mësuar dhe qytetarët presin rezultatin. Zgjedhësit shqiptar e thanë fjalën e tyre, pavarësisht pandemisë, ka pasur një pjesëmarrje të lartë, kjo është një tregues i mirë i jetës demokratike në Shqipëri.
Më lejoni të them që e kam mirëpritur këtë proces pilot, votimin elektronik në Njësinë 10, e cila mund të implementohet më gjerë në të ardhmen. Prandaj ne po presim me qetësi, ashtu siç kanë bërë thirrje udhëheqësit politik në Shqipëri, përfshirë edhe presidentin. Deri sa të numërohet vota e fundit, të presim me qetësi dhe të mos dalim në konkluzione pa u numëruar të gjitha votat në vend.
Ne si ekip i BE do të vijomë punën tonë, e kemi bërë këtë në të gjithë vendin, ka 50 skuadra në të gjithë Shqipërinë, do e ndjekim nga afër procesin. Kemi bashkëpunuar nga afër me OSBE/ODIHR, është ajo në krye të vëzhgimit.
Të gjithë po presim konferencën me gjetjet paraprake e cila do të mbahen në 15:00, është shumë e rëndësishme për BE e cila do të përpilojë mënyrën se si kanë ecur zgjedhjet në Shqipëri. Ndoshta sot vonë të ketë ndonjë deklaratë nga udhëheqësit e BE në lidhje me procesin zgjedhor në Shqipëri. Roli i medias në këtë moment është shumë i rëndësishëm, vazhdoni të bëni këtë punë të mirë”, u shpreh Soreca.
