Parlamenti i Spanjës miratoi një ligj që lejon personat mbi 16 vjeç të ndryshojnë gjininë e tyre të regjistruar ligjërisht pa ndonjë mbikëqyrje mjekësore.
Sipas ligjit, të hartuar nga qeveria e koalicionit e majtë, të miturit e moshës 12 ose 13 vjeç do të kenë nevojë për autorizimin e një gjyqtari për të bërë ndryshimin, ndërsa ata midis 14 dhe 16 vjeç do të duhet të shoqërohen nga prindërit ose kujdestarët e tyre ligjorë.
Ligji ndalon gjithashtu të ashtuquajturat terapi konvertimi për të shtypur orientimin seksual ose identitetin gjinor, vendos gjoba dhe ndëshkime për sulmet ndaj personave LGBT dhe rrëzon ligjin që i pengonte çiftet LGBT të regjistronin fëmijët e tyre nën emrat e të dy prindërve.
Deri më tani, njerëzit transgjinorë kishin nevojë për një diagnozë nga disa mjekë të disforisë gjinore, e cila është gjendja psikologjike e të mos ndjesh një përputhje midis seksit biologjik dhe identitetit gjinor. Në disa raste, ata gjithashtu kishin nevojë për prova se kishin jetuar për dy vjet sipas gjinisë me të cilën identifikoheshin apo edhe të dhëna që tregonin se kishin marrë hormone.
Grupet e të drejtave të transgjinorëve thonë se ligji përfaqëson një “para dhe pas” në të drejtat LGBT. Por disa aktiviste feministe e konsiderojnë vetëvendosjen gjinore si një kërcënim për konceptin e seksit biologjik.
Gjatë kohës që seanca e votimit po zhvillohej në Parlament, dhjetëra aktivistë për të drejtat e transgjinorëve u mblodhën para ndërtesës duke dëgjuar debatin në celularët e tyre.
Projektligji do të bëhet ligj sapo të miratohet nga Senati, një hap që pritet deri në fund të vitit.
Projektligji, i sponsorizuar nga e majta ekstreme Unidas Podemos (Të bashkuar ne mundemi), partia e vogël në koalicionin qeveritar, pason një debat të fortë parlamentar 18-mujor.
Ajo u kundërshtua ashpër nga partitë e opozitës së krahut të djathtë dhe gjithashtu krijoi disa përçarje brenda partisë socialiste të kryeministrit Pedro Sánchez, e cila u përpoq të prezantonte një amendament që kërkon mbikëqyrje gjyqësore për personat deri në 16 vjeç që duan të ndryshojnë gjininë e tyre të regjistruar. Në fund, kjo kërkesë do të zbatohet vetëm për personat nën 13 vjeç.
Irene Montero, Ministre e Barazisë dhe anëtare e United we Can tha se ndihej krenare për Kongresin që deklaroi se “të drejtat trans janë të drejta të njeriut”.
Votimi i Kongresit spanjoll vjen në të njëjtën kohë që parlamenti skocez po debaton një projekt-ligj të ngjashëm që jep vetëvendosjen gjinore.
