Shqiptarët duket se po i largohen konsumit të alkoolit pasi edhe numri i të alkoolizuarve po vjen në rënie. Studimi i fundit i Institutit të Shëndetit Publik nxjerr në pah se 59,6% e burrave dhe 28,3% e grave në Shqipëri konsumojnë alkool.
Ekspertët thonë se, kjo shifër ka qenë më lartë në vitin 2009 kur 62,8% e burrave dhe 30,3% e grave konsumonin alkool. Në rënie të ndjeshme ka ardhur edhe numri i të alkoolizuarve.
Referuar tre studimeve të kryera nga Instituti i Shëndetit Publik vërehet se kjo shifër ka rënë nga 27,5% në 2002 në 6,4% për burrat e grupmoshës 14-44 vjeç ndërsa tek gratë kjo shifër varion nga 3,3% në 2002 në 0,8% aktualisht.
Specialistët kanë dalë në përfundimin se me rritjen e moshës, burrat kanë tendencë të konsumojnë më tepër alkool se gratë.
Sipas OBSH, në mbarë botën çdo vit rreth 3 milionë vdekje rezultojnë nga abuzimi me alkoolin, kjo përfaqëson rreth 5.3% të të gjitha vdekjeve. Abuzimi me alkoolin është gjithashtu përgjegjës për më tepër se 200 sëmundje apo lëndime.
/Burimi: Tv Klan/
