Faqet e internetit të qeverisë ukrainase janë goditur nga një sulm kibernetik duke bërë që disa faqe me rendësi të jenë të bllokuara.
Zëdhënësi i ministrisë së jashtme të Ukrainës është shprehur për agjencinë e lajmeve Reuters se është shumë herët për të thënë se kush qëndron pas sulmit, por deklaroi se Rusia ka kryer sulme të ngjashme në të kaluarën.
Sulmi kibernetik, i cili goditi ministrinë e jashtme, kabinetin e ministrave, këshillin e sigurisë dhe mbrojtjes vjen pasi Kievi dhe aleatët e tij kanë paralajmëruar një sulm të mundshëm rus në Ukrainë.
‘I gjithë informacioni juaj është bërë publik, kini frikë dhe përgatituni për më të keqen. Kjo është për të kaluarën, të tashmen dhe të ardhmen’- thuhej në një mesazh i cili u shfaq në gjuhën ruse, polake dhe ukrainase në të gjitha faqet e hakuara.
Ministria e Jashtme ruse nuk i është përgjigjur akuzave por më parë Rusia ka mohuar se ka gisht në këto sulme kibernetike .
Kjo ngjarje vjen pasi bisedimet Rusi-NATO nuk sollën zhvillime pozitive. Kremlini i quajti krejtësisht të pasuksesshme bisedimet e kësaj jave.
/Priza.al/
