Policia e Kosovës është sulmuar mbrëmjen e djeshmë gjatë patrullimit në Mitrovicë-Jarinje, në fshatin Rudar të Zveçanit.
Mësohet se gjatë kontrollit në kamion janë hedhur mjete piroteknike nga disa automjete që janë afruar drejt njësive policore.
Sakaq si pasojë e sulmit nuk ka pasur persona të lënduar.
Njoftimi i Policisë:
Mbrëmë, më 10.06.2022 rreth orës 22:15, patrulla policore e policisë kufitare, gjatë patrullimit në magjistralen Mitrovicë-Jarinje, në fshatin Rudar të Zveçanit, ka vërejtur një kamion të cilin e ka ndaluar për kontroll. Kamioni drejtohej nga një mashkull kosovar, gjatë kontrollit të kamionit, janë gjetur 56 (pesëdhjetë e gjashtë) krerë dele. Drejtuesi i kamionit nuk posedonte asnjë dokument për origjinën ose prejardhjen e kafshëve. Gjatë procedurave të kontrollit të kamionit, kanë ardhur disa automjete të dyshuara nga të cilat janë hedhur mjete piroteknike në afërsi të njësisë policore. Nga këto mjete nuk ka pasur persona të lënduar. Kurse, kamioni është shoqëruar në terminalin doganor në Mitrovicë Jugu për procedura të mëtejme.
