Maturantët e Tiranës dhe të qyteteve të tjera kanë protestuar sot për orë të tëra, duke kërkuar rivlerësimin e testit të matematikës. Ata kërkuan gjithashtu ulje të tavanit të pikëve, teksa paralajmëruan se nëse nuk plotësohen kërkesat do të protestojnë sërish nesër.
Dhjetëra maturantë bllokuan sot ‘Rrugën e Durrësit’, teksa lëshonin thirrje për drejtësi. Maturantët kërkojnë që të ulet pikësimi për testin e Matematikës, i cili u zhvillua dje ndërkohë që ata pretendojnë se në këtë provim pati pyetje jashtë programit mësimor. “Uljen e pikësimit, provimi ishte i vështirë, pasi ishte një test universitar. Kjo është mënyra jonë. Do vazhdojmë të rrimë këtu deri sa të na plotësohen kërkesat”, tha një maturant.
Për shkak të protestës, është bllokuar ky aks rrugor, ndërsa drejtuesit e mjeteve kanë devijuar. Protesta ka përfunduar pas qëndrimit për disa minuta para godinës QSHA-së. Sipas tyre, nuk përjashtohet dhe mundësia e bojkotimit të provimit të fundit të maturës shtetërore.
