Thatësira që ka prekur shumicën e vendeve të Bashkimit Evropian do të jetë më e forta që nga shekulli i 16-të.
Kështu raporton transmetuesi britanik “Sky News”.
“Për momentin … duket të jetë viti më i keq në 500 vjet, megjithëse në retrospektivë do të jetë e nevojshme një analizë e plotë”, deklaroi Andrea Toreti, një shkencëtar i lartë në Qendrën e Përbashkët Kërkimore të BE-së.
Studiuesi shtoi se kjo ngjarje nuk është analizuar plotësisht, por bazuar në përvojën e tij, ndoshta është edhe më ekstrem se viti 2018.
Atë vit, moti veçanërisht i thatë dhe i nxehtë la Evropën qendrore dhe veriore me rendimente të kulturave kryesore 50 për qind më të ulëta.
Por kushtet e lagështa “të favorshme” në Evropën Jugore çuan në një rritje të mprehtë të rendimenteve.
Një efekt lëkundje jashtëzakonisht i rrallë e ka mbrojtur bllokun nga efektet e thatësirës rajonale.
Kjo, duke parandaluar paqëndrueshmërinë më të lartë dhe rritjen e çmimeve.
Sipas Toretit, këtë vit “për dallim, pjesa më e madhe e Evropës” është subjekt i motit anormalisht të nxehtë dhe të thatë dhe thatësirat po ndikojnë në prodhimin e ushqimit dhe energjisë, ujin e pijshëm dhe kafshët e egra.
Shifrat e fundit nga Observatori Evropian i Thatësirës (EDO) tregojnë se rreth 45 për qind e territorit të bllokut është në kushte paralajmëruese – e dyta nga tre kategoritë e thatësirës – në 10 ditët që çojnë deri në 20 korrik.
Më shqetësuesja është se 15 për qind e tokës ka kaluar në gjendjen më të rëndë të “alarmit”, çka do të thotë se jo vetëm po thahet toka, por po vuajnë edhe bimët dhe të mbjellat.
Italia është një nga vendet më të goditura nga thatësira aktuale, duke shpallur gjendjen e jashtëzakonshme në zonat përreth lumit Po, i cili përbën më shumë se një të tretën e prodhimit bujqësor të vendit.
Franca ka ngritur një ekip krizash për t’u përballur me thatësirën e saj më të madhe në histori, e cila ka lënë fshatrat e djegura pa ujë të pijshëm të sigurt dhe fermerët paralajmërojnë për mungesë qumështi këtë dimër
