Mbas fitores së Milanit përballë Sassuolos ditën e djeshme ku dhe kuqezinjtë janë kurorëzuar kampionë për herë të 19 në Itali, një ngjarje e pazakontë i ka ndodhur trajnerit Stefano Pioli i cili ka mbetur pa medaljen e kampionatit pasi ia kanë vjedhur tifozët e skuadrës së tij.
Ka qenë vetë trajneri i kuqezinjve ai i cili ka lëshuar apelin për të rigjetur këtë medalje që ka një vlerë shumë të madhe për të sa i përket asaj që përfaqëson në aspektin sentimental për karrierën e tij më shumë së sa vlerës monetare. Me sa duket, gjatë pushtimit të fushës që nisi pas ceremonisë, dikush i ka hequr atij nga qafa medaljen e sapofituar.
“Më kanë shkulur medaljen nga qafa gjatë festimeve. Nëse mund të bëni një apel ju falënderoj, sepse është e vetmja që kam”, ishte mesazhi i Piolit për mediat në konferncë për shtyp.
