Një operacion antidrogë është finalizuar me sukses në Tiranë, ku janë arrestuar dy persona, mes të cilëve edhe Klajdi Serjani, nipi i Pajtim Serjanit, një emër i njohur për policinë për veprimtari kriminale të mëparshme. Gjatë operacionit, i koduar “Fam Fanz”, u sekuestrua një sasi prej 1 kg dhe 50 gramë kokainë, e cila kishte një vlerë të lartë në treg, rreth 270,000 euro.
Policia ka arrestuar në flagrancë Klajdi Serjanin, 24 vjeç, dhe shokun e tij, Xhenjo Manushi, 20 vjeç, të dy banues në Tiranë. Ata u kapën në automjetin e drejtuar nga Serjani, ku pas kontrollit u gjet droga. Përveç lëndës narkotike, u sekuestruan edhe celularët dhe një shumë parash.
Të arrestuarit janë të dyshuar për shpërndarje të drogës në qytetin e Tiranës dhe hetimet po vazhdojnë për të identifikuar dhe kapur persona të tjerë të përfshirë në këtë aktivitet kriminal.
