Këto ditë kemi parë në media të paktën dy raste të kapjes, masakrimit dhe varjes në litar, të dy peshkaqenëve nga peshkatarë të Durrësit.
Kronikat e dhëna me bujë edhe nga mediat televizive dhe portalet kanë treguar se si peshkatarët tanë “heronj”(injorantë) kanë arritur të kapin pas shumë mundimesh peshkaqenët, që pasi i kanë masakruar dhe varur në makaranë e peshkarezhave, nuk kanë lënë pa e “reklamuar” barbarinë e tyre edhe me foto.
Këto nuk kanë qenë rastet e vetme, pasi çdo vit në ujërat tona peshkatarë nga Durrësi, Vlora, Saranda apo Lezha, kapin peshkaqenë të përmasave të ndryshme dhe i varrin në litarë si të ishin “shkelës kufiri” dhe “armiq të popullit”, pa e kuptuar se me vrasjen e një peshkaqeni kanë prishur majën e një zinxhiri të tërë ushqimor detar, që shumë shpejt do t’i lërë pa peshk.
Ndërkohë, jo më larg se sa dje, një lajm nga brigjet e Spanjës, ka bërë xhiron e botës për rastësinë dhe më pas për sjelljen e pushuesve dhe të autoriteteve me një peshkaqen blu.
Peshkaqeni të paktën 6 metra i gjatë, është shfaqur papritur në bregdetin e Benidorm-it në Spanjë dhe kjo gjë ka shkaktuar pak frikë por dhe kureshtje të madhe tek pushuesit që ndodheshin aty.
Në pamjet e publikuara nga mediat më të mëdha si “The Sun” apo “Daily Mail”, shihet teksa pushuesit largohen nga bregu nga rojat e plazhit, deri në ardhjen e ekspertëve detar, që kanë bërë edhe largimin e butë të bishës.
Britanikja Christine Kettley, 36 vjeçe, ishte me familjen e saj në plazhin e mbushur me njerëz, kur peshkaqeni po shëtiste pranë bregut. Nëna e tre fëmijëve tha për “The Sun” se: “Ky peshkaqen ishte i madh, rreth 8 këmbë i gjatë dhe po përpëlitej mbi ujë, pasi ngeci në cektinë”.
Prej disa kohësh Roja Bregdetare spanjolle me një helikopter dhe dy skafe e monitoroi peshkaqenin blu, i cili për orë të tëra përshkroi brigjet e plazhit dhe më pas ngeci në rërë në cekëtinë, duke tentuar dëshpërimisht largimin.
Por ishin ekspertët detarë dhe disa roja plazhi që bënë të mundur shpëtimin e kafshës që me sa duket kishte ngatërruar orientimin e rrymës, duke e nxjerrë atë pa e dëmtuar deri në thellësi, si dhe pa vënë në rrezik jetën e pushuesve.
Peshkaqenët blu, si ai që u shfaq në ujërat e Benidorm në Spanjë, gjenden zakonisht në ujërat e Mesdheut dhe në ujërat britanike në muajt e verës. Ata mund të arrijnë deri në 12 metra në gjatësi dhe ka episode ku kanë sulmuar edhe njerëzit.
Por gjithsesi, kur vjen fjala për kafshë të tilla si pushuesit, si peshkatarët, si autoritetet, tregojnë një kujdes të veçantë për të mos i vrarë apo dëmtuar këto kafshë.
Gjithsesi, nga barbaria e njeriut, çdo vit llogaritet të vriten mbi 100 milionë peshkaqenë në të gjitha detet e botës, duke bërë që këto kafshë të jenë në rrezik serioz zhdukjeje.
/Burimi: The Sun/Përshtati: Priza.al/
