Një 27-vjeçar nga Shkodra u vu në pranga pasi po trafikonte në mënyrë të paligjshme tetë klandestinë kundrejt fitimit.
Ai u arrestua në fshatin Lukovë të Himarës, ndërsa bashkëpunëtori i tij, po nga Shkodra, ka braktisur automjetin dhe më pas është arratisur.
Autoritetet kanë ngritur pika kontrolli dhe po punojnë për lokalizimin dhe më pas arrestimin e tij.
Gjatë kontrollit u bllokuan dy automjete “Range Rover”, me të cilat dy të rinjtë, po trafikonin tetë klandestinët.
Identiteti i dy personave: Nikolin Kolovata dhe bashkëpunëtori i tij Alfred Bala.
Njoftimi i Policisë:
Finalizohet operacioni policor i koduar “Border 6”, i zhvilluar nga DVKM Vlorë, në bashkëpunim me Forcën Speciale “Delta” dhe Seksionin për Hetimin e Trafiqeve dhe Narkotikëve në DVP Vlorë. Transportonin kundrejt fitimit, me 2 automjete, 8 emigrantë të paligjshëm, nuk iu bindën urdhrit të punonjësve të Policisë për të ndaluar, vihet në pranga 1 shtetas, shpallet në kërkim bashkëpunëtori i tij.
Sekuestrohen 2 automjetet me të cilat transportoheshin emigrantët.
Shërbimet e Policisë Kufitare Vlorë, në bashkëpunim me Forcën Speciale “Delta” dhe Seksionin për Hetimin e Trafiqeve dhe Narkotikëve në DVP Vlorë, në vijim të operacioneve për parandalimin, evidentimin dhe goditjen e dhënies ndihmë emigrantëve nga vendet e treta, kundrejt pagesave, për të kaluar ilegalisht kufirin, bazuar dhe në infomacionet e siguruara nga inteligjenca informative, kanë finalizuar operacionin policor të koduar “Border 6”, për goditjen e një tjetër rasti të kësaj veprimtarie të kundërligjshme.
Si rezultat i këtij operacioni u arrestua në flagrancë shtetasi N. K., 27 vjeç, banues në Shkodër, si dhe u shpall në kërkim bashkëpunëtori i tij, shtetasi A. B., 32 vjeç, banues në Shkodër.
Gjatë operacionit, në fshatin Lukovë, Himarë, shërbimet e Policisë, bazuar në informacionet e siguruara nga inteligjenca informative se me dy automjete “Range Rover” po transportoheshin emigrantë, janë vënë në ndjekje të tyre. Sapo kanë konstatuar se po ndiqeshin nga Policia, drejtuesit e automjeteve, shtetasit N. K. dhe A. B. janë larguar me shpejtësi, duke mos iu bindur urdhrit të punonjësve të Policisë, për të ndaluar.
Shtetasi N. K. ka tentuar t’i shmanget përgjegjësisë ligjore, duke zbritur nga automjeti emigrantët që po transportonte, por është kapur dhe prangosur nga shërbimet e Policisë. Shtetasi A. B. ka braktisur automjetin me të cilin po transportonte pjesën tjetër të emigrantëve dhe duke përfituar nga terreni i vështirë është larguar me shpejtësi në këmbë. Vijon puna për kapjen e tij.
2 automjetet u sekuestruan në cilësinë e provës materiale.
Vijojnë hetimet për dokumentimin e plotë të kësaj veprimtarie kriminale, identifikimin dhe kapjen e shtetasve të tjerë të përfshirë në të.
Materialet i kaluan Prokurorisë, për veprime të mëtejshme.
Arrestohet nikolin kolovata alfred bala ne kerkim
