Sipas Moskës, burgu u bombardua nga ukrainasit me raketa amerikane, por Kievi akuzon rusët se vrasin vetë të burgosurit për të fshehur shenjat e torturës.
“Versioni rus i sulmit të 29 korrikut në burgun Olenivka në të cilin vdiqën mbi 50 të burgosur ukrainas të luftës, kryesisht nga batalioni Azov, ka shumë të ngjarë një mashtrim.” Ky është përfundimi i një hetimi të CNN bazuar në analizën e videove dhe fotografive, imazheve satelitore dhe në punën e ekspertëve të mjekësisë ligjore dhe armëve.
Ministria ruse e mbrojtjes kishte pohuar se burgu ishte bombarduar me raketa Himars, të ngjashme me ato që u furnizuan forcat ukrainase nga SHBA. Sipas specialistëve, megjithatë, shumica e shenjave tregojnë se në qendrën e paraburgimit ka rënë zjarr dhe, sipas disa dëshmitarëve, nuk është dëgjuar zhurmë raketash.
Ditët e fundit atë e kishte vizituar edhe aktori Steven Seagal, përfaqësues special për Rusinë për marrëdhëniet humanitare me Shtetet e Bashkuara të Amerikës. Sipas një postimi në Twitter nga Max Seddon, kreu i zyrës së Moskës të Financial Times.
Seagal vizitoi “vendin e ish të burgosurve të luftës në Olenivka, ku Ukraina thotë se Rusia ka masakruar dhjetëra të burgosur për të fshehur provat e torturës”. Udhëheqësi i Republikës së vetëshpallur të rajonit të Donetsk, Denis Pushilin, shpjegoi më pas se Seagal do të intervistonte të burgosurit e luftës të ndaluar në Olenivka.
