Drejtuesit e ekipit të njohur italian të futbollit, AS Roma, kanë stërvitur për disa ditë me radhë futbollistët e vegjël të Tiranës. Në fund të “AS Roma Camp” u shpërndanë edhe disa certifikata për fëmijët e talentuar.
Kryetari i Bashkisë së Tiranës, Erion Veliaj, i cili mori pjesë në ceremoninë përmbyllëse të këtij turneu, u shpreh i lumtur që, ashtu siç në nivel lokal dy bashkitë, e Tiranës dhe Romes, kanë një bashkëpunim të shkëlqyer, kjo përvojë pozitive po adaptohet edhe në fusha të tjera, si ato sportive.
“Për ne ka qenë një privilegj i jashtëzakonshëm bashkëpunimi me Romën. Ne kemi një traditë bashkëpunimi me qytetin në nivel kryetarësh bashkish. Roberto Gualtieri ishte jo vetëm tifozi i Romës, por tani është bërë edhe tifozi i Tiranës. Që kur ka mbaruar finalja dhe Roma u shpall kampione, Tirana është bërë një lloj “Meke” e vogël për të gjithë romanët, sepse duan të vijnë në Tiranë, në qytetin ku u thye mallkimi 60 e ca vjeçar, për të parë stadiumin, pastaj kthehen në vizitorë që përsërisin vizitat e tyre, kalojnë kohë, shpenzojnë, dhe fakti që sot prej këtij bashkëpunimi sportiv, të dyja qytetet janë afruar, është diçka e mrekullueshme,” u shpreh Veliaj.
Kreu i Bashkisë tha se kjo është një mundësi shumë e mirë për ata fëmijë që kanë ëndërr të luajnë me skuadra të mëdha evropiane.
“Lutem që secili prej jush, që e ka këtë ëndërr, t’i shkojë deri në fund, ndoshta ta mbajë veshur këtë uniformë, ose uniforma të tjera prestigjioze, dhe të na sjellë shumë krenari. Fakti që ne rrethohemi nga shokë dhe miq që janë pjesë e kësaj historie suksesi, që fillojnë me një kamp rinor dhe më pas shkojnë më lart, është diçka vërtet e mrekullueshme,” tha ai.
Veliaj e kishte një apel edhe për të gjithë ata prindër që hezitojnë t’i regjistrojnë fëmijët në sport:
“Një nga arsyet pse ne insistojmë kaq shumë, nuk është detyrimisht te çmimet dhe trofetë, sesa te fakti që duke luajtur në skuadër mëson që jeta ka fitore, ka edhe humbje. Doja të ftoja edhe prindërit e tjerë, ndoshta jo të gjithë ndajnë pasionin tuaj, që edhe në një ditë të dielë, ditë Pashke, jeni këtu. Një apel të gjithë prindërve: këtë vit që jemi Qyteti Europian i Sportit 2023, duam ta përdorim si motivim për të regjistruar sa më shumë fëmijë në aktivitete sportive. Duam që prej kësaj alibie fantastike të kemi sa më shumë fëmijë e të rinj në aktivitet fizik,” e mbylli Veliaj fjalën e tij.
