Kryebashkiaku i Tiranës Erion Veliaj në 60-vjetorin e gjimnazit “Sami Frashëri”, risolli disa prej kujtimeve të tij, pasi ishte nxënës i kësaj shkolle. Veliaj tha se rindërtimi i kësaj shkolle moderneve, ka qenë një emocion i veçantë per të si kryetar i Bashkisë.
“Kisha kohë pa përjetuar kaq shumë emocione, përqafime, kujtime, një retrospektivë e gjithë jetës, të atyre viteve të vështira ‘94 – ‘98, të atyre ndryshimeve të mëdha, të një Tirane që ziente, por unë sot jam shumë mirënjohës dhe krenar që të them jam ‘Samist’ dhe mezi e kam pritur këtë ditë, që t’ju shoh të gjithëve bashkë, nga gjithë brezat e nxënësve, mësuesve. Emocion më të fortë, më të bukur dhe më të madh se rindërtimi i ‘Sami Frashërit’ s’e kisha përjetuar kurrë. Faleminderit që ma dhatë këtë privilegj për shkollën tonë, e shpresoj që jo vetëm kjo ditëlindje e 60-të, por edhe e 160-ta e më tej, të jenë kujtime të bukura të një shkolle që, ndoshta ka lënë më shumë gjurmë në të gjithë historinë e Shqipërisë se çdo shkollë tjetër në Republikë”, tha ai.
Veliaj shprehu mirënjohjen për të gjithë brezat e mësuesve të shkolles, një pjesë e të cilëve sot nuk jetojnë më, ndërsa u shpreh se prej saj kanë dalë edhe plot emra personalitetesh që e kanë bërë krenar Shqipërinë sot edhe nëpër botë.
