Kur Shqipëria dhe Serbia po flasin dhe po punojnë gjithmonë e më shumë për “Open Balcans”, duke i bërë thirrje edhe Kosovës që të bashkohet në këtë nismë, kjo e fundit duket se ka një tjetër “mendje”.
Qeveria e Kosovës sapo e ka tensionuar sërish situatën në kufirin me Serbinë, duke bllokuar kalimin për të gjitha automjetet me targa serbe, që vijnë nëë drejtim të vendit.
Shkak ka qenë vendimi i papritur që nga sot qeveria e Prishtinës ka vendosur reciprocitetin ndaj Serbisë, sa i përket targave të automjeteve. Mësohet se, vendimi është firmosur nga Ministri i punëve të Brendshme, Xhelal Sveçla.
Sipas këtij vendimi, është e detyrueshme që të gjitha automjetet që mbajnë targa të Serbisë dhe hyjnë në Kosovë të pajisen me targa të përkohshme. Po ashtu bëhet e ditur se pajisja me këto targa bëhet në të gjitha pikat kufitare të Kosovës.
Targat duhet të vendosen në vende të dukshme dhe për pajisjen me këto targa duhet paguar taksa prej 5 eurove.
Mes të tjerash bëhet e ditur se pajisja me targa të përkohshme për të gjitha automjetet që mbajnë targa të Serbisë dhe hyjnë në Territorin e Republikës së Kosovës. Pajisja me targa të përkohshme bëhet në të gjitha pikat e kalimit kufitar të Republikës së Kosovës.
Është e detyrueshme po ashtu që shoferët e mjeteve që targat e përkohshme t’i vendosin në vende të dukshme, para dhe mbrapa mjetit.
Vlefshmëria e targave të përkohshme është 60 ditë. Taksa për targat e përkohshme nga pika 1 e këtij vendimi është 5 euro. Palët do të pajisen me vërtetim si zëvendësim i certifikatës së regjistrimit të automjetit.
/Priza.al/
