Kryebashkiaku i Tiranës, Erion Veliaj është takuar me banorët e njësisë 7 në kryeqytet ku gjatë bisedës me ta u shpreh se vlera e pronës në këtë zonë është rritur me dyfishin e saj.
Ai u kërkoi qytetarëve që të vënë të parë familjen e tyre dhe jo partitë e të votojnë për ata që kanë besim se do i çojnë gjërat përpara.
“Sot, po të shohësh se si me zhvillimin e ish Fushës së Aviacionit dhe me hapjen e Astirit pas tre vitesh bllokim, krejt papritur e gjithë lagjja tjetër po konturohet dhe qyteti po rritet me të njëjtën shpejtësi, do të thotë që jo vetëm mund të ecim përpara, por edhe mund të mbajmë ritmin me zhvillimin e pjesëve të tjera të qytetit. Fakti që edhe gjysma tjetër që konsiderohej një xhep midis Lanës dhe Fushës së Aviacionit, sot është kantieri më i madh i zhvillimit dhe urbanizimit, flet vetë dhe mezi pres që ta vazhdojmë këtë punë dhe të ecim përpara. Familja më e rëndësishme politike është familja jote. Nëse ty të intereson çerdhja, kopshti, shkolla, do lidhësh kontratë me ata që të bënë kopshtin, çerdhen e shkollën. Nëse dikush thotë hajde bëjmë luftë me Amerikën, nuk besoj se ka njeri këtu që do të bëjë luftë me Amerikën. Kur mendoj se sa ka qenë çmimi i pronës te ish Fusha e Aviacionit në 2015 dhe si në disa raste është 2 apo 3-fishuar, do të thotë që kjo mbjellje pemësh, ky pastrim, ky mjedis këtu me terrenet sportive, i japin vlerë. Kur bëhet edhe rruga, edhe infrastruktura arsimore, në atë zonë që konsiderohej xhep, sot i jep vërtetë vlerë pronës”, tha Veliaj.
Ai deklaroi se fushata vjen me frymën e debatit, por parimi i tij është “më mirë mbjellim pemë e paqe, sesa sherr e inat”.
“E di që fushata vjen më atë frymën e debatit. Parimi i kësaj fushate është, më mirë mbjellim pemë e paqe, sesa sherr e inat. Këtë gjë e bëjmë për dashurinë e komunitetit tonë, jo se kemi inat dikë tjetër. Kemi vendosur që ato shpenzime të fushatës t’i ndajmë. Patjetër, do bëjmë edhe veprimtari promovuese, por në pjesën më të madhe duam të mbjellim pemë. Kur shikoj ata që paguajnë 100 mijë euro stadiumin, ndërkohë flasin për varfërinë dhe të nxjerrin sytë për tërmetin dhe për pandeminë, pa bërë dhënë një pjatë supë apo një pako ushqimore me lekët që u vijnë nga Rusia – se qartazi, rusët janë korrektë me pagesat që kanë për agjentët e tyre këtu – është mëkat se si në 2023 udhëheqës politikë u flasin stadiumeve bosh, ndërkohë mund të bënin shumë e më shumë punë”, u shpreh Veliaj.
Kryebashkiaku mbylli fjalën e tij me një urim për të gjithë besimtarët myslimanë që festojnë nesër Bajramin: “Për të gjithë ata që kanë agjëruar, Zoti ua pranoftë! Gëzuar paraprakisht Bajramin të gjithë atyre që e festojnë dhe besoj se sot më shumë se kurdo vlen shprehja e Fishtës: ‘Kemi Bajram e Pashkë, por Shqipërinë e kemi bashkë’. Në këtë muaj na ranë të gjitha bashkë, pikërisht për të ilustruar që bashkimi sjell fuqinë e puna është më e mirë se dhuna dhe dashuria i reziston dhe urrejtjes. Unë besoj se gjithmonë e më shumë njerëzit po binden që gjërat që shkojnë përpara na e përmirësojnë jetën të gjithëve”.
