Detaje të reja kanë dalë nga vrasja e rëndë në Shkodër ku vëllai vrau motrën me armë zjarri në lagjen “Ndoz Mazi”.
Diana Vuka u gjet e pajetë në banesë, teksa dyshohet se është vrarë që të premten në darkë më 5 qershor, pra 3 ditë më parë. Viktima u gjet brenda në dhomën e saj në shtratin ku flinte.
Në banesë policia e Shkodrës ka gjetur 6 shishe birre 1.5 kg secila të boshatisura gjë e cila tregon se autori i dyshuar ka qenë totalisht nën efektin e alkoolit kur ka kryer krimin tragjik.
Sipas burimeve nga vendngjarja autori i dyshuar Fabian Vuka ishte një person i alkoolizuar gjatë gjithë kohës ndërsa thuhet se ka luajtur edhe bixhoz shpesh.
Para afro 3 viteve ai e ka rrahur motrën e tij e cila fillimisht ka bërë denoncim në polici, por më pas e ka tërhequr.
Fabian Vuka u arrestua brenda oborrit të shtëpisë ndërsa policia ka gjetur edhe armën e krimit tip pistoletë me silenciator me të cilën kreu vrasjen, gëzhoja si dhe disa prova të tjera.
Pas vrasjes, ka folur shoqja e viktimës, Rajmonda Sokoli. Ajo deklaroi se motra e ndihmonte të vëllain, duke i dërguar 300 euro në muaj.
“Diana kishte ardhur me pushime nga Gjermania. Nuk përgjigjej që të premten. Ajo i dërgonte vëllait 300 euro në muaj. Diana ka qenë një njeri shumë i mirë dhe e ka ndihmuar të vëllanë, por ai i mori jetën”, deklaroi shoqja e viktimës.
/Priza.al/
