Presidenti i Serbisë, Aleksandar Vuçiq, ka konfirmuar se ka vendosur ta dekorojë ish-të dërguarin e posaçëm të Shteteve të Bashkuara të Amerikës për dialogun ndërmjet Kosovës dhe Serbisë, Richard Grenell.
“Ky vendim s’ka të bëjë me Qeverinë. Është vendim i imi. Mendoj se ai ishte ndër të paktit njerëz nga SHBA-ja që ka pasur qasje më të balancuar, që ishte jashtëzakonisht e rëndësishme për shtetin tonë për Kosovën dhe Metohinë. Ai nuk është se mendon ndryshe nga pjesa tjetër e administratës amerikane, por ka qenë gjithmonë i gatshëm të dëgjojë palën serbe”, ka thënë Vuçiqi në një konferencë për media të mërkurën.
Grenelli ka qenë emisar për dialogun Kosovë-Serbi, në kohën kur Donald Trump ishte president i SHBA-së.
Dekorimi i tij u bë në Ditën e Shtetësisë së Serbisë, kur presidenti ndan urdhra të lartë shtetërorë për individë, shërbimet e të cilëve i dallon.
