Ushqyerja është një aspekt shumë i rëndësishëm i shëndetit të organizmit. Ekspertët thonë se koha e ushqyerjes është gjithashtu shumë e rëndësishme.
Një studim i publikuar në revistën Nutritional Science, këshillon se ushqyerja në bazë të kohës, mund t’ju vijë në ndihmë për të humbur kilogramët e tepërt.
Ushqehu Në Bazë Të Orareve
Kjo metodë ka të bëjë me konsumimin e ushqimit në orare të caktuara gjatë ditës. Në studimin e lartpërmendur, pjesëmarrësit u ndanë në dy grupe. Grupi i parë konsumonte mëngjesin 60-90 minuta më vonë se zakonisht dhe darkën 60-90 minuta më herët. Grupi i dytë iu përmbajt rutinës së përditshme të ushqyerjes.
Në fund të studimit, ekspertët zbuluan se grupi i parë kishte humbur më tepër kilogramë dhe kishte reduktuar sasinë ditore të kalorive. Për më tepër, ky grup kishte reduktuar edhe faktorët e rrezikut të shëndetit siç është kolesteroli i lartë. Falë këtyre rezultateve, ekspertët thanë se ushqyerja e kufizuar në bazë të kohës ishte shumë efikase në humbjen e masës dhjamore.
A Duhet Të Jetë Fleksibël Ushqyerja
Pjesëmarrësit në studim e patën të vështirë t’i përmbaheshin orareve kufizuese të ushqyerjes. Këto orare, herë pas here ndërhynin me angazhimet e ndryshme shoqërore dhe familjare. Megjithatë, 43 % e tyre thanë se do të vazhdonin me këtë regjim nëse oraret do të ishin më fleksibël. Gjithsesi këshillohet, që nëse do të nisni këtë regjim,ta bëni gradualisht. Nisni të largoni pak e nga pak orarin e mëngjesit dhe të afroni nga pak orarin e darkës, deri sa të arrini ta afroni me 60-90 minuta.
Një qasje më e lehtë është kombinimi i regjimit me orare të kufizuara, me regjimin e kufizimit të ushqimit. Ky i fundit mund të aplikohet në mënyra të ndryshme. Disa të tjerë thonë se njeriu mund të zgjedhë të kufizojë sasitë e kalorive për 500-600 kalori, për dy herë në javë.
Një metodë tjetër është mosngrënia për 16 orë në ditë. Por le të kthehemi tek ushqyerja me orare të kufizuara. Sipas ekspertëve, kjo teknikë mund të reduktojë masën dhjamore, kolesterolin dhe glukozën në gjak. Njerëzit që i përmbahen këtij regjimi, ndihen më pak të uritur dhe hanë më pak. Regjime të tilla luftojnë obezitetin dhe përmirësojnë cilësinë e jetës.
/Burimi: AgroWeb/
