Kreu i grupit parlamentar socialist, Taulant balla ka bërë me dije se Partia Socialiste nuk do të votojë kandidaturat e Partisë Demokratike për Avokat të Popullit.
Balla e cilësoi të turpshme që PD ka shkuar në Kuvend me 11 kandidatura. Ai shtoi se PS nuk do të mbështesë një avokat që përfaqëson PD-në në çdo çështje dhe asnjë tjetër që ka mbështetjen e Sali Berishës.
“Turpi juaj që vini me 11 kandidatura, por çështja juaj. Jemi njohur me një shkresë që është tërhequr mbështetja për një pjesë. Ne i kemi parë me vëmendje. Duam që të zgjedhim një avokat populli sikurse ka emrin. Ne nuk do ta mbështesim kandidaturën e zotit Ledio Braho sepse nuk mund të jetë avokati që të përfaqësojë çdo çështje të PD. Gjeni ndonjë avokat që të fitojë ndonjë çështje se edhe këto i ka humbur të gjitha. Duhet avokati i popullit jo avokati i Partisë Demokratike. Keni dhe një kandidat tjetër, Altin Goxhaj. Mjafton firma e Saliut aty që kjo kandidaturë të mos merret fare në konsideratë”, tha Balla.
