Kryetari i Partisë Demokratike ka zgjedhur që të jetë aktiv në këtë situatë zjarresh në mbarë vendin, ndaj për këtë ka gjetur pikërisht për të “shigjetuar” rivalin e tij kryesor, kryeministrin Rama.
Lulzim Basha ka reaguar sot lidhur situatës së rënduar të zjarreve në vend duke gjetur një foto në një prej helikopterëve “Cougar” të FA-së, sipas të cilës thotë se “edhe të vetmin helikopter e ka marrë Rama për shëtitje”.
Me anë të një statusi në rrjete sociale, ai shkruan se në një kohë kur vendi po përballet me situatën e rënduar, kryeministri Edi Rama përdor helikopterin e ushtrisë për udhëtimet e tij.
Ndaj thotë ai, fondet e shtetit mungojnë.
“Mirënjohje për punonjësit e emergjencave civile dhe forcat e ushtrisë që po përballen me flakët përgjatë këtyre orëve të vështira.
Pamjet që i shfaqin teksa luftojnë me mjete rrethanore janë sa pikëlluese po aq sa indinjuese kur shohim se në të njëjtën ditë, Edi Rama, i heq përballjes me zjarrin helikopterin e ushtrisë, për ta përdorur për udhëtimet e tij.
Natyrisht, kërcënimi i zjarrit është i kudondodhur në rajon, por nuk ndodh askund që në një moment krize, mjetet e pakta të mpaken edhe më shumë për t’i shtuar privilegjet një individi.
Kjo nuk është papërgjegjshmëri, por modeli me të cilin është keqqeverisur dhe varfëruar vendi.
Prandaj nuk ka fonde dhe mjete për t’u përballur me emergjencat, qofshin zjarre apo tërmete, sepse shteti përdoret si instrument i një pakice që punon për vete, jo për qytetarët”,- shkroi Basha.
/Priza.al/
