Kompania e videokonferencave në grup ‘Zoom Video Communications’, e cila u bë e njohur në mbarë botën në mes të pandemisë dhe bllokimit, ka njoftuar se po pushon nga puna 1300 punonjësit e saj, ose 15% e stafit të saj.
Ajo po ndjek shembullin e kompanive të tjera të teknologjisë që kanë njoftuar gjithashtu pushime masive nga puna. Më shumë se 300 kompani teknologjike që nga fillimi i vitit 2023 kanë njoftuar pushime totale nga puna të afro 100,000 punëtorëve në mbarë botën.
Heqja graduale e pandemisë ka çuar në një ngadalësim të rritjes së përdoruesve dhe një rënie të fitimeve të Zoom. Themeluesi dhe shefi ekzekutiv i platformës Eric Yuan tha se ai dhe drejtuesit e tjerë në kompani do të merrnin gjithashtu ulje të konsiderueshme pagash, sipas BBC dhe Reuters.
“Ndërsa bota po kalon në jetën pas pandemisë, ne po shohim që njerëzit dhe bizneset vazhdojnë të mbështeten te Zoom. Por pasiguria e ekonomisë globale dhe ndikimi i saj tek klientët tanë do të thotë që ne duhet të bëjmë një rishikim të ashpër, por të nevojshëm, në mënyrë që të mund të adresojmë mjedisin ekonomik, t’u përgjigjemi klientëve tanë dhe të realizojmë vizionin afatgjatë të Zoom”, tha Yuan në mesazhin e tij me shkrim drejtuar stafit.
Të ardhurat e Zoom ishin trefishuar në vitin 2020 dhe ishin rritur 55% në 2021, por në vitin 2022 rritja e tij ishte vetëm rreth 7%, ndërsa pati një rënie të mprehtë të përfitueshmërisë prej rreth 38%. Aksionet e kompanisë kanë humbur më shumë se 80% të vlerës së tyre që nga kulmi i tyre në 2020 dhe ranë me 63% vitin e kaluar, por janë rritur gati 10% pas shpalljes së pushimeve nga puna.
